A Confraría de Pescadores de San Martín de Moaña, que data  do ano 1921, é a entidade responsable da xestión dos recursos pesqueiros e marisqueiros da localidade pontevedresa de Moaña, cuxa longa tradición e amplo patrimonio, dan testemuña da súa forte vinculación histórica co mar. Somos unha corporación de dereito público e sen ánimo de lucro, dotada de personalidade xurídica e capacidade de obrar, para cumprir os seus fins e realizar as funcións que lle son encomendadas, actuando como órgano de consulta e colaboración coa administración, traballando na promoción do sector e na defensa dos seus intereses económicos, sociais e corporativo do sector do mar de acordo cos principios de legalidade, transparencia contable e democracia, na súa estrutura interna e funcionamento.

Entre os numerosos produtos comercializados pola Confraría na lonxa atópanse: ameixa rubia, ameixa babosa, ameixa xaponesa, ameixa fina, berberecho, carneiro, ameixón, cornicha, navalla e longueirón vello.