A LONXA DE CANIDO é unha iniciativa da Confraría de Pescadores de Vigo que nace da necesidade de achegar os produtos do mar capturados polos seus socios e socias directamente ás persoas consumidoras, así como aos negocios de restauración local. Esta páxina servirá de escaparate e punto de encontro, onde poderás coñecer que produtos se poden adquirir na nosa lonxa, así como outras novas de interese.

Todos os produtos comercializados pola Confraría de Pescadores de Vigo están certificados polas marcas de calidade PESCADERÍAS e PESCAENVERDE. A marca pescadeRías, de onde se non?, é un selo de identidade para a promoción e defensa dos peixes e mariscos procedentes da frota artesanal, que garante a frescura e a orixe de Galicia. Pola súa banda, Pescaenverde é unha ecoetiqueta que achega información á persoa consumidora sobre o baixo impacto que estes produtos pesqueiros teñen sobre o medio ambiente, ao tempo que lles engade valor aos produtos que incorporan a marca, favorecendo a súa venda nun mercado global.

Pola súa parte, as algas comercializadas pola Confraría de Vigo contan co selo ecolóxico do CRAEGA (Consello Regulador da Agricultura Ecolóxica de Galicia).